அதிகம் வருத்தும் அல்சர்

இன்றைய வாழ்க்கைச் சூழலில் அல்சர் நோயாளிகளின் எண்ணிக்கை நாளுக்கு நாள் அதிகரித்துவருகிறது. உலகம் முழுவதிலும் நூற்றில் இருபது பேருக்கு இந்தப் பாதிப்பு உள்ளது. என்றாலும், இந்தியா உள்ளிட்ட சுகாதாரம் குறைந்த நாடுகளில் இது இரண்டு மடங்கு அதிகம். மேலும், இங்கு 10 வயதிலேயே அல்சர் பாதித்துவிடுகிறது. 40 வயதில் இது ஆவேசம் காட்டுகிறது.

எது அல்சர்?

இரைப்பை மற்றும் சிறுகுடலின் முதல் பகுதியில் புண் ஏற்படுவதை ‘பெப்டிக் அல்சர்’ (Peptic ulcer) என்கிறோம். இரைப்பையில் ஹைட்ரோகுளோரிக் அமிலம் சுரக்கிறது; பெப்சின் என்சைம் உற்பத்தியாகிறது. இந்த இரண்டின் சுரப்புகளும் அதிகமாகும்போது இரைப்பை மற்றும் முன்சிறுகுடலில் உள்ள சவ்வு சிதைந்து புண்ணாகிறது. இதுதான் ‘பெப்டிக் அல்சர்’.

காரணங்கள் என்ன?

அல்சர் ஏற்பட பல காரணங்கள் உள்ளன. என்றாலும், இரண்டே காரணங்கள்தான் பிரதானம். ஒன்று இரைப்பையில் அமிலம் அதிகமானாலும் அல்சர்!  மற்றொன்று இரைப்பைச் சுவரின் தற்காப்பு சக்தி குறைந்தாலும் அல்சர்! இந்த இரண்டுக்கும் நம் நவீன வாழ்வியல் முறைதான் அடிப்படை!

அமிலச் சுரப்பு அதிகமாவதற்கு முதல் காரணம் அந்நிய நாடுகளின் துரித உணவுகள். இரைப்பையில் அமிலம் சுரப்பதை எஃப்.எம் வானொலியை டியூன் செய்வதற்கு ஒப்பிடலாம். 93.5 அலைவரிசையை டியூன் செய்தால் சூரியன் எஃப்.எம்; ஹலோ எஃப்.எம்.முக்கு 106.4.

இதுமாதிரிதான், நாம் இட்லி சாப்பிட்டால் அதைச் செரிமானம் செய்ய சாதாரண அளவில் அமிலம் சுரக்கும். அதேவேளையில் செயற்கை நிறமும் மணமும் தூக்கலாக உள்ள மட்டன் பிரியாணி சாப்பிட்டால், அமிலத்தின் அளவு பலமடங்கு அதிகரித்துவிடும். அளவுக்கு அதிகமான அமிலம் ஓர் அக்கினிபோல் எழுந்து இரைப்பையைத் தாக்கும். அப்போது அல்சர் வரும்.

வானொலிகள் எல்லாமே சரியாக காலை 5 மணிக்கு ஒலிபரப்பை ஆரம்பித்து விடுவதுபோல் இரைப்பையிலும் காலை, மதியம், இரவு மூன்று வேளைகளிலும் முறையே 8, 1, 8 என்ற மணி அளவில் இந்த அமிலம் சுரக்கத் தொடங்கிவிடும். அந்தச் சரியான நேரங்களில் நாம் சாப்பிட்டுவிட வேண்டும். இல்லையென்றால், இந்த அமிலம் இரைப்பைச் சுவர்களைத் தின்ன ஆரம்பிக்கும். நேரத்தோடு சாப்பிடாதவர்களுக்கு அல்சர் இந்த வழியில்தான் வருகிறது.

நாம் காரம் சாப்பிட்டாலும் புளிப்பு சாப்பிட்டாலும் அமிலம் அதிகமாகும். இன்னும் சிலருக்கு எண்ணெய் காரணமாக இருக்கும். சொல்லுங்கள், இன்றைக்குக் காரம், புளிப்பு, எண்ணெய் மிதக்காத ஒரு துரித உணவை உங்களால் கைகாட்ட முடியுமா?

இரைப்பையில் அமிலம் அதிகம் சுரப்பதற்கு அடுத்த காரணம் மனசு. ஆம்! மனசுக்கும் இரைப்பையில் இருக்கும் அமிலச் சுரப்பிகளுக்கும் நடுவில் வேகஸ் எனும் நரம்புப் பாலம் உண்டு. இதன் வழியாகத்தான் மூளையிலிருந்து அமிலம் சுரப்பதைத் தூண்டுகிற ‘வேதிவீரர்கள்’ இரைப்பைக்கு வந்து சேருகின்றனர். மன அழுத்தம், கவலை, கோபம், எரிச்சல், பரபரப்பு போன்ற மனசு சார்ந்த பிரச்சினைகள் நம்மை பாதிக்கும் போதெல்லாம் இரைப்பையில் அமிலம் அளவுக்கு அதிகமாகச் சுரந்து அல்சருக்கு வரவேற்பு வளையம் வைக்கும்.

அல்சருக்குப் புகையும் மதுவும் ஓர் இரட்டைக் குழல் துப்பாக்கி! இவை அமிலச் சுரப்பையும் அதிகப்படுத்தும்; ஏற்கனவே அல்சர் இருந்தால் நெய் ஊற்றி ஹோமம் வளர்ப்பதைப்போல் அதைத் தீவிரப்படுத்தும். அல்சர் மாத்திரைகளையும் வேலை செய்யவிடாது.

இந்த ஆன்லைன் யுகத்தில் அமேசான் அறிமுகம் ஆன பிறகு ஆன்லைனில் மாத்திரை/மருந்து வாங்கிச் சாப்பிடுவது அதிகரித்துவிட்டது. இப்படியான சுயமருத்துவத்தில் முதலில் பாதிக்கப்படுவது இரைப்பைதான். அதிலும் குறிப்பாக ஆஸ்துமா மற்றும் மூட்டுவலிகளுக்கு தரப்படும் ஸ்டீராய்டு மாத்திரைகள், தலைவலி மாத்திரைகள், வலிநிவாரணி மாத்திரைகள் ஆகியவற்றை மருத்துவரின் ஆலோசனை இல்லாமல் அடிக்கடி சாப்பிடுவது அமிலச் சுரப்புக்கு ஊக்கம் கொடுக்கும்.

கிருமியும் காரணம்

சுகாதாரம் குறைந்தாலும் அல்சர் வரும் என்று சொன்னேன். என்ன காரணம்? ‘ஹெச். பைலோரை’ (Helicobacter pylori) எனும் கிருமி. இது கண்ணுக்குத் தெரியாத பாக்டீரியா கிருமி. இது அசுத்தமான தண்ணீரில்தான் வசிக்கும். அதைக் குடிப்பவர்களுக்கு அல்லது அந்தத் தண்ணீரில் சமைத்த உணவைச் சாப்பிடுபவர்களுக்கு இது சுலபத்தில் தொற்றிக்கொள்ளும். உதாரணம், இன்றைக்கு சாலையோர உணவகங்களில் எந்த அளவுக்குத் தண்ணீர் சுத்தமாக இருக்கும் என்று உறுதி கூறமுடியாது. ஆனாலும், அங்கு சாப்பிடுவோரின் எண்ணிக்கை அதிகம். அதனால் அல்சர் பாதிப்பும் அதிகம்.

அறிகுறிகள் என்ன?

இந்த நோயின் துக்கத்தில் நெஞ்சுப் பகுதியில் எரிச்சலும் வலியும் ஏற்படும். அடிக்கடி புளித்த ஏப்பம் உண்டாகும். பசி இல்லாமல் இருக்கும். கொஞ்சமே சாப்பிட்டாலும் வயிறு நிரம்பியதுபோல் தெரியும். நெஞ்சில் ஏதோ பந்து வந்து அடைப்பதுபோலத் தோன்றும். இந்த உணர்வு ஏப்பம் விட்டதும் சரியாகும்.

நோயின் அடுத்தகட்டமாக வயிற்றில் வலி தோன்றும். இரைப்பையில் சுரக்கும் அமிலம் அங்குள்ள புண்மேல் படுவதால் இந்த வலி வருகிறது. அடுத்து, உணவு சாப்பிட்ட பின்பு இதே வலி உண்டாகும். இதற்குக் காரணம், உண்ட உணவு இரைப்பைப் புண்ணில் படுவதுதான். சிலருக்கு இந்த வயிற்று வலி நடுமுதுகுக்கும், வயிற்றின் வலது பக்கத்திற்கும் பரவலாம்.

பின் வயிற்று வலிக்கு அடுத்தபடியாக வாந்தி வரும். வாந்தியினால் நோயாளிக்கு நன்மையும் உண்டு; தீமையும் உண்டு. அடிக்கடி வாந்தி வந்தால் சரியாக உணவு சாப்பிட முடியாது, இதனால் உடல் எடை குறையும். உடல் மெலியும். இது தீமை. இரைப்பைப் புண் உள்ளவர்கள் வாந்தி எடுக்கும்போது, இரைப்பையில் உள்ளது எல்லாமே வெளியில் வந்துவிடுவதால் அங்கு அமிலத்தன்மை குறைந்துவிடும். இதனால் வயிற்றுவலி தற்காலிகமாக குறையும். இது இவர்களுக்கு நன்மை. இதற்காக வயிற்றுவலியைத் தாங்க இயலாத ஒருசிலர் தாங்களாகவே வாய்க்குள் விரலை விட்டு வாந்தி எடுக்கத் தூண்டுவார்கள்.

மேலும் இரைப்பையில் புண் உள்ளவர்களுக்கு உணவு சாப்பிட்டவுடன் வயிற்றுவலி அதிகமாகும்; வாந்தி எடுத்தால் வயிற்றுவலி குறையும். முன்சிறுகுடலில் புண் உள்ளவர்களுக்கு சாப்பிட்டவுடன் வயிற்றுவலி குறையும்.

நோய் அறியும் முறைகள்

இரைப்பைப் புண்ணை உறுதிசெய்ய 'என்டோஸ்கோப்பி பரிசோதனை' (Gastro endoscopy) உதவுகிறது. இந்தக் கருவி மூலம் புண்ணின் சிறு பகுதியை வெட்டியெடுத்து, திசுப் பரிசோதனைக்கு (Biopsy) அனுப்பி, புண் சாதாரணமானதா, புற்றுநோயைச் சேர்ந்ததா அல்லது ஹெச்.பைலோரி கிருமி உள்ளதா என்பதையும் தெரிந்துகொள்ள முடியும். ரத்தப் பரிசோதனை மூலம் ஹெச்.பைலோரி கிருமிக்கு எதிரணுக்கள் (Antibody) உள்ளனவா என்பதைக் கண்டறிந்தும் இக்கிருமி பாதிப்பை உறுதி செய்யலாம்.  மலத்தில் இந்தக் கிருமியின் புரதக்கூறு (Antigen) உள்ளதா என்பதைத் தெரிந்துகொள்வதன் மூலமும் இந்தப் பாதிப்பை அறியலாம்.

சிகிச்சை என்ன?

அல்சருக்கு மருந்து சிகிச்சை முக்கியமானது. நோயின் நிலைமையைப் பொருத்து, நான்கு வகை மருந்துகள் தரப்படுகின்றன. அதாவது, இரைப்பையில் சுரக்கின்ற அமிலத்தைச் சமப்படுத்துபவை; அமிலம் சுரப்பதைத் தடை செய்பவை; புண்ணின்மேல் அமிலம் படுவதைத் தடுப்பவை. ஹெலிக்கோ பேக்டர் பைலோரி கிருமிக்குத் தரப்படும் கூட்டுமருந்து. இவற்றோடு வயிற்றுவலியைக் குறைக்கும் மாத்திரைகள், வாந்தியை நிறுத்தும் மாத்திரைகள், இரைப்பை இயக்கத்தைச் சீராக்கும் மாத்திரைகள், மன அமைதியைத் தரும் மாத்திரைகள் என நோயாளியின் தேவைக்கேற்ப சிகிச்சை அளிக்கப்படும்.  இப்போதெல்லாம் அல்சருக்குத் தொடர்ந்து 6-8 வாரங்களுக்கு மருந்து, மாத்திரைகள் சாப்பிட்டால் நல்ல நிவாரணம் பெற முடியும்.

தடுப்பது எப்படி?

மாத்திரை, மருந்தோடு முறையான உணவுப் பழக்கமும் முக்கியம். நேரத்தோடு சாப்பிடுவது, அளவோடு சாப்பிடுவது, நிதானமாகச் சாப்பிடுவது, காரம், மசாலா, புளிப்பு நிறைந்த உணவுகளைத் தவிர்ப்பது, புகைபிடிப்பதை நிறுத்துவது, மதுவை மறப்பது, வலி நிவாரணி மாத்திரைகளை மருத்துவர் ஆலோசனையின் பேரில் மட்டுமே பயன்படுத்துவது, காபி மற்றும் கோலா பானங்களை அளவோடு உபயோகிப்பது, கவலை, மன அழுத்தம், பரபரப்பு, கோபம், எரிச்சல் போன்ற உளம் சார்ந்த குறைபாடுகளைக் களைவது, தியானம், யோகாசனம் மேற்கொள்வது ஆகிய வழிகள் அல்சர் வராமல் தடுக்கும். மன நிம்மதியும், நல்ல உறக்கமும் அவசியம். 

அல்சர் உள்ளவர்கள் கவனிக்க!

• வயிறு நிறைய சாப்பிடாதீர்கள். உடல் உழைப்பு குறைந்தவர்கள் முக்கால் வயிறு சாப்பிட்டால் போதும்.
• சாப்பிட்டு மூன்று மணி நேரத்துக்குள் நொறுக்குத் தீனி சாப்பிடுவதை நிறுத்தவும்
• அசைவ உணவு சாப்பிட்டதும் குளிர்பானங்கள், கோலா பானங்கள் மற்றும் ஜூஸ் குடிப்பதைத் தவிர்க்கவும்.
• காலை உணவைத் தவிர்க்க வேண்டாம்.
• இரவில் எளிதாகச் செரிக்கக்கூடிய உணவைச் சாப்பிடுங்கள்.
• சமைத்த உணவையும் சமைக்காத உணவையும் ஒரே நேரத்தில் சாப்பிட வேண்டாம்.
• உணவு சாப்பிட்ட உடனே பழங்களைச் சாப்பிடாதீர்கள்; இடைவேளைகளில் சாப்பிடுங்கள்.
• உணவைச் சீரான இடைவெளியில் புரித்துச் சாப்பிடுவதை வழக்கப்படுத்திக்கொள்ளுங்கள்!

(பேசுவோம்...)