திமுகவின் பலம் நாடாளுமன்றத்தைத் தாண்டியும் அதிகரிக்கட்டும்!

மக்களவையைத் தொடர்ந்து, மாநிலங்களவையிலும் பலம் மிக்க கட்சியாக உருவெடுக்கிற திமுக, டெல்லியில் தனது கவனத்தைக் கூர்மைப்படுத்த சரியான வரலாற்றுத் தருணமாக இதைப் பயன்படுத்திக்கொள்ள வேண்டும். 

2019 மக்களவைத் தேர்தலுக்குப் பிறகு பாஜக (301), காங்கிரஸ் (52) இரண்டு தேசியக் கட்சிகளுக்கும் அடுத்த பெரிய கட்சியாக உருவெடுத்தது திமுக (24). ஒட்டுமொத்த நாடாளுமன்றப் பிரதிநிதித்துவத்தில், மக்களவையில் 301, மாநிலங்களவையில் 94 என்று 395 உறுப்பினர்களுடன் பாஜக முதலிடத்தில் இருக்கிறது. மக்களவையில் 52, மாநிலங்களவையில் 33 என்று 85 உறுப்பினர்களுடன் காங்கிரஸ் இரண்டாவது இடத்தில் இருக்கிறது. மக்களவையில் 22, மாநிலங்களவையில் 11 என்று 33 உறுப்பினர்களுடன் திரிணமுல் காங்கிரஸ் மூன்றாவது இடத்தில் இருந்தது. இந்த வரிசையில், மக்களவையில் 24, மாநிலங்களவையில் 7 என்று 31 உறுப்பினர்களுடன் திமுக நான்காவது இடத்தில் இருந்தது.

இப்போது மாநிலங்களவையில் மேலும் மூன்று இடங்களைக் கைப்பற்றுவதன் மூலம் மொத்த பிரதிநிதித்துவத்தில் 34 என்கிற எண்ணிக்கையுடன் மூன்றாவது இடத்துக்கு முன்னேறுகிறது திமுக. இது திமுகவுக்கு ஒரு வரலாற்றுத் தருணம் என்று சொல்வதில் மிகை இருக்க முடியாது. ஓர் அரசியல் கட்சி என்கிற வரையறையைத் தாண்டி தன்னுடைய பாத்திரத்தை இரண்டு வகைகளில் திமுக இன்று விஸ்தரிக்க முடியும். முதலாவதாக, தமிழகத்தின் உரிமைகளுக்கான முன்னகர்வுகளை உளப்பூர்வமாக முன்னெடுப்பதன் வாயிலாக மாநிலங்களுக்கான முன்னுதாரண பிரதிநிதி என்கிற இடம் நோக்கி அது நகர முடியும். இரண்டாவதாக, எதிர்க்கட்சிகளின் வரிசையில் ஆக்கபூர்வமான மாற்று அரசியலை முன்வைக்கும் கூட்டாட்சி சக்தியாக அது தன்னைத் திரட்டிக்கொள்ள முடியும்.

முந்தைய காலங்களில், ஆளும் கூட்டணியின் ஒரு சக்தி வாய்ந்த பங்காளியாக இருந்தது போன்ற ஒரு முக்கியத்துவம் இப்போது இல்லை என்பதாலேயே திமுக நாடாளுமன்ற உறுப்பினர்கள் ஓய்ந்திருக்க வேண்டியது இல்லை. முன்னெப்போதையும்விட இப்போதுதான் அவர்கள் துடிப்பாகச் செயலாற்ற வேண்டிய காலகட்டத்தில் நாட்டின் சூழல் இருக்கிறது. பிரதான எதிர்க்கட்சியான காங்கிரஸ் எண்ணிக்கை அளவில் பலவீனப்பட்டிருப்பதுகூட பெரிய இழப்பு இல்லை; அக்கட்சியின் தலைமை வரலாற்றிலேயே இல்லாத அளவுக்குப் பலவீனப்பட்டிருப்பது நாடு எதிர்கொண்டிருக்கும் பேரிழப்பாகும். இடதுசாரிகள் சிந்தனைத் தளத்தில் திவால் ஆகிவிட்டார்களோ என்று எண்ணும் அளவுக்கு ஸ்தம்பித்து நிற்கிறார்கள். பெரும்பான்மை மாநிலக் கட்சிகளின் போக்கு எந்த வகையிலும், பாஜகவின் மையப் போக்குக்கு மாற்றாக இல்லை. திரிணமூல் காங்கிரஸ் கட்சி சீற்றத்துடன் பாஜகவை எதிர்கொள்கிறது என்றாலும், நாடு தழுவிய ஒரு கூட்டாட்சி மாற்றை முன்வைக்க தத்துவார்த்தத் தளத்தில் அதற்குப் பெரிய பின்புலம் இல்லை.

நிச்சயமாக, இவை எல்லாமும்கூடி திமுகவை மைய அரங்கின் கவனத்துக்குக் கொண்டுசெல்கின்றன. இந்திய அரசு கொண்டுவந்த மூன்று வேளாண் சட்டங்கள் மற்றும் குடியுரிமைத் திருத்தச் சட்டத்தைத் திரும்பப் பெற வலியுறுத்தி நிறைவேற்றப்பட்ட தீர்மானங்கள் ஆகட்டும்; ‘நீட்’ - மருத்துவப் பொது நுழைவுத் தேர்வுக்கு எதிராகவும், அத்தேர்விலிருந்து விலக்கு அளிக்கக் கோரியும் நிறைவேற்றப்பட்ட தீர்மானம் ஆகட்டும்; தமிழ்நாடு சட்டமன்றத்தின் குரல் தேசிய கவனத்தை ஈர்த்திருக்கிறது. இந்த விஷயங்கள் ஏற்கெனவே முன்னெடுக்கப்பட்டவைதான் என்றாலும், கூட்டாட்சி விவகாரத்தில் திமுக தலைவர் மு.க.ஸ்டாலின் தொடர்ந்து கொடுத்துவரும் உறுதியான குரலோடு இணைத்துப் பார்க்கப்படுவதால் இவை கூடுதல் முக்கியத்துவம் பெறுகின்றன.

திமுக அடுத்த நிலைக்கு இந்த விஷயத்தை எடுத்துச்செல்ல ஏனைய கட்சிகளோடு உரையாட வேண்டும்; பாஜகவுடனும்கூட. டெல்லிக்குச் செல்வது என்பது நாடாளுமன்றத்தில் பேசுவது என்பதாக மட்டும் குறுகிடக் கூடாது. தமிழகத்துக்கு வெளியே எல்லா மாநிலங்களுக்கும் சென்று எல்லாக் கட்சிகளுடனும் திமுக பேச வேண்டும். முக்கியமாக இந்தி பேசும் மாநிலங்களுடன் உரையாட ஆரம்பிக்க வேண்டும். சமாஜ்வாதி கட்சி, ராஷ்டிரிய ஜனதா தளம், ஜார்கண்ட் முக்தி மோர்ச்சா என்று இளம் தலைவர்கள் முக்கியப் பங்காற்றிடும் ஒரு புதிய அணிவரிசை இன்று உருவாகியிருக்கிறது; சித்தாந்தத் தளத்தில் கூட்டாட்சியின் முக்கியத்துவம் தொடர்பில் இந்தி மாநிலங்களிலும் பேசும் சூழல் உருவாகியிருக்கிறது. திமுகவால் அவர்களிடம் பேச முடியும்.

பாஜக என்பது இன்று ஒரு கட்சி மட்டும் இல்லை; அது ஒரு சிந்தனையாகவும், பண்பாட்டு போக்காகவும் மாறிவருகிறது; தேர்தல் வியூக எதிர்ப்பு மட்டும் எடுபடாது; மாற்றுத் திட்டத்தை முன்வைத்து மக்களிடம் உரையாடுவதன் வழியாகவே பாஜகவுக்கான மாற்றத்தை உண்டாக்க முடியும். திமுகவின் நிறுவனர் அண்ணா கூறியதுபோல, நாட்டின் கூட்டாட்சிக்கான உறுதியான கூர்முனையாக திமுக செயலாற்றுவதற்கான சூழல் இன்று உருவாகிவிட்டிருக்கிறது. திமுகவின் பலம் அதன் எண்ணிக்கையைத் தாண்டியும் அதிகரிக்கட்டும்!