அரசு மருத்துவமனையின் சுத்தம் ஒரு கூட்டுப் பொறுப்பு: டீன் எதிர்வினை

திரு.வ.ரங்காசாரி எழுதிய ‘மழைநாளில் மருத்துவச் சித்திரவதைகள்’ கட்டுரைக்கு, சென்னை ராஜீவ் காந்தி அரசு மருத்துவமனையின் முதன்மையர் டாக்டர் இ. தேரணிராஜன் மிகுந்த பொறுப்புணர்வோடு ஓர் எதிர்வினை ஆற்றியிருக்கிறார். மருத்துவமனையில் நோயாளிகள் - உடனிருப்பவர்கள் வசதிக்காக மேற்கொள்ளப்பட்டுவரும் நடவடிக்கைகளை அவர் பட்டியலிட்டிருக்கிறார். கூடவே அரசு மருத்துவமனைகள் எதிர்கொள்ளும் சவால்களையும், சங்கடங்களையும் குறிப்பிட்டிருக்கிறார்.  ‘அரசுப் பள்ளிகளும், அரசு மருத்துவமனைகளும் சமூகத்தின் முக்கியமான அங்கங்கள். அவற்றையும், அவற்றில் பணியாற்றுவோரின் உரிமைகளையும் பாதுகாப்பது சமூகக் கடமை’ என்ற உணர்வையே ‘அருஞ்சொல்’ கொண்டிருக்கிறது. இதே உரிமையுடனேயே குறைகளையும் அது சுட்டிக்காட்டுகிறது. டாக்டர் தேரணிராஜனின் கடிதம், மிக ஆக்கபூர்வமானது; வரவேற்புக்குரியது. அரசு மருத்துவமனை நிர்வாகத்தில் நிலவும் சிரமங்களைப் பொதுச் சமூகம் அறிந்துகொள்ள இந்தக் கடிதம் உதவுகிறது. உண்மையில் மக்களுக்கும் அரசின் அங்கத்தினருக்கும் இடையே இப்படியான ஒரு பாலமாக, உரையாடல் களமாகச் செயல்படவே ‘அருஞ்சொல்’ விரும்புகிறது. உரையாடல்கள் தொடரட்டும். - ஆசிரியர்    

 ⁋

திரு.வ.ரங்காச்சாரி அவர்களுக்கு வணக்கம். ‘மழை நாளில் மருத்துவமனை சித்திரவதைகள்’  என்ற தலைப்பில் தாங்கள் வெளியிட்டுள்ள கருத்துகள் கிடைக்கப்பெற்றேன். 

முதலில், உங்கள் சகோதரரின் மறைவிற்கு என் ஆழ்ந்த இரங்கல்களைத் தெரிவித்துக்கொள்கிறேன். சஞ்சலமடைந்த மனநிலையில் தாங்கள் தெரிவித்துள்ள புகார்களுக்கு , மருத்துவமனையின் முதல்வர் என்ற முறையில், அவசியமான சில விளக்கங்களை அளிக்க விரும்புகிறேன் . ‘தூய்மையே இறைமை’ என்ற மனோபாவத்துடன் நானும் என் குழுவினரும், இம்மருத்துவமனையின் தூய்மையைப் பேண பற்பல முயற்சிகளை மேற்கொண்டுவருகிறோம்.

பரந்து விரிந்துள்ள இம்மருத்துவமனையின் ஒவ்வொரு பகுதியையும் தினந்தோறும் நானே நேரில் சென்று ஆய்வுசெய்வது, என் அன்றாடப் பணிகளில் மிக முக்கியமான ஒன்று. தாங்கள் குறிப்பிட்டுள்ள கழிப்பறையும் என் நேரடி ஆய்வில் தினந்தோறும் இடம்பெறும் ஒன்று தான் என்பதைத் திட்டவட்டமாகத் தெரிவித்துக்கொள்கிறேன். அக்கழிப்பறையை அடிக்கடி சுத்தம்செய்ய பிரத்தியேகமாக தூய்மைப் பணியாளர்கள் நியமிக்கப்பட்டுள்ளார்கள். 

கழிப்பறையின் வெளிப்புறச் சுவரில், முகம் பார்க்கும் கண்ணாடியைப் பொருத்தியதும், பல் துலக்க ஏதுவாக இரண்டு வாஷ்பேஸின் பொருத்தியதும் சமீபத்தில் நிகழ்ந்த ஏற்பாடுகள். பின் ஏன் இந்தக் குறைபாடுகள் என்று நீங்கள் ஆச்சரியப்படலாம். இம்மருத்துவமனக்கு நாள்தோறும் 10,000 - 15,000 நபர்கள் வருகிறார்கள்.

இந்த எண்ணிக்கை, நகரின் ஆகப் பெரிய தனியார் மருத்துவமனைக்கு வரும் நபர்களின் எண்ணிக்கையைக் காட்டிலும் பற்பல மடங்கு அதிகம். மருத்துவமனைக்கு அன்றாடம் வரும் நபர்கள் பற்பல வகையினர். அவர்களில் பெரும்பாலோர் பொதுக்கழிப்பறையைப் பயன்படுத்துவதற்கான அடிப்படை விதிகளைக்கூட அறவே பின்பற்றாதவர்கள் என்பது வேதனையும் விரக்தியும் தரும் அப்பட்டமான உண்மை. 

அறியாமையால் அசுத்தம் செய்பவர் சிலர்; அலட்சியத்தால் தவறிழைப்பவர் சிலர்; ஆணவத்தால் விதி மீறுபவர் சிலர். மருத்துவமனை வளாகத்தில் புகைப்பிடித்தல் தடைசெய்யப்பட்டுள்ளதால், கழிப்பறையை, புகைப்பிடிக்கும் இடமாகப் பயன்படுத்தும் அவலம் தொடர்கிறது. அதைவிடக் கொடுமை மது பாட்டில்களைக் கழிப்பறையில் வீசிச்செல்லும் அநீதி.

தவறிழைக்கும் நபர்களிடம் அவர்களது தவறைச் சுட்டும் போது எங்கள் பணியாளர்கள் எதிர்கொள்ளும் எதிர்வினைகள் , பெரும்பாலும் மிக்க வருத்தத்தையும் மனச்சோர்வையும் ஒருங்கே தருவதாகவே இருக்கின்றன. பொதுநலன் கருதி அளிக்கப்படும் அறிவுறுத்தல்களை, தம் மீது ஏவப்பட்ட தனிநபர் விமர்சனங்களாகக் கருதும் அவலமான மனப்பாங்கு பரவலாக உள்ளது.

அநாகரிகமான பேச்சுகளையும் நியாயமற்ற ஏச்சுகளையும் கேட்டுக்கேட்டு எங்கள் ஊழியர்கள் பரிதவித்துப்போவது நிஜம். (இன்று மதியம் நான் ஆய்வு மேற்கொண்டபோதுகூட, ஒரு நபர், பீடித்துண்டை உள்ளே வீசிவிட்டு, தள்ளாடியபடியே வெளியில் வந்ததை எதிர்கொண்டேன்) நீங்கள் குறிப்பிட்டுள்ள உடைந்த கதவு, ஒரு தன்னிலை மறந்த பயனாளியின் அராஜகச் செயலின் விளைவுதான். கொசுக்கள் பெருக்கத்தைக் குறைக்க, கொசு மருந்துப் புகைத்தெளிப்பை அன்றாடம் மேற்கொள்கிறோம். அதில் மேலும் அதிக கவனம் செலுத்துவோம். நாய்களை அப்புறப்படுத்த ஏற்கெனவே முயற்சிகள் மேற்கொண்டுள்ளோம். ஆனால், தற்போதைய வழிகாட்டுதல்களின்படி , நாய்களைப் பிடித்துக்கொண்டுபோய், கருத்தடை செய்து திரும்பவும் கொண்டு வந்து விட்டுச்செல்கிறார்கள். திரும்பவும் நாய்களை அகற்ற முயற்சி மேற்கொள்வோம். 

நோயாளிகளின் உடன் வருவோரின் நலன் காத்தல், மருத்துவமனை நிர்வாகத்தின் கடமை என்ற தங்களின் கருத்து ஏற்புடையதே. இம்மருத்துவமனையில் 2,000 — 3,000 உள்நோயாளிகள் உள்ளனர். அனைத்து நோயாளிகளுக்கும் (உடன் இருக்கத் தேவையே இல்லாத மிதமான பாதிப்புடன் உள்ள நோயாளிகள் உட்பட) குறைந்தது ஒரு நபராவது உடன் உள்ளார். ஆயிரக்கணக்கான நோயாளிகளின் உடன் இருப்பவர்களுக்கு வசதிகள் மேற்கொள்வது மிகப்பெரிய சவால் என்பதை உணர்த்த விரும்புகிறேன். மருத்துவமனையின் அனைத்து வராண்டாக்களிலும், அடுக்குக்கட்டட வளாகங்களில் உள்ள காத்திருப்போர் அரங்கங்களிலும் மற்றும் வெளிப்புறப் பாதை ஓரங்களிலும், உடன் வருவோருக்காக வரிசை நாற்காலிகள் போடப்பட்டுள்ளன.

முப்பத்தைந்து இடங்களில், உடன் வருவோருக்காகவென்றே அனைத்து வசதிகளுடன் (மேசை, நாற்காலி, மின்விசிறி, தூய்மையான குடிநீர், கை கழுவ வாஷ் பேசின்) கூடிய மிகத்தூய்மையான உண்ணும் அறைகள் சமீபத்தில் அமைக்கப்பட்டு அனைத்துத் தரப்பினரின் ஏகோபித்த பாராட்டுதல்கள் கிடைக்கப்பெற்றோம். பயனாளிகளின் கருத்துகளையும் குறைகளையும் தெரிந்துகொள்ள 25 இடங்களில் புகார்/ ஆலோசனைப் பெட்டிகள் வைத்துள்ளோம். பெறப்படும் குறைகளை உடனடியாகத் தீர்க்க நடவடிக்கைகள் மேற்கொள்ளப்படுகின்றன. இவை அனைத்தும் நோயாளிகள் மற்றும் உடன் வருவோரின் நலன் கருதி மேற்கொள்ளப்பட்ட செயல்கள். மேலும் மேம்படுத்தவும் நடவடிக்கைகள் எடுத்துவருகிறோம்.

⁋

இம்மருத்துவமனை யாருக்கும் அந்நியப்பட்டுவிடவில்லை. சமூகத்தின் அனைத்துத் தரப்பினரும் நம்பிக்கையுடன் நாடிவரும் மருத்துவமனையாகவே திகழ்கிறது. தாங்கள் சுட்டிக்காட்டிய குறைகளில் நியாயம் இருந்தாலும், அக்குறைகளை, ஆகப் பெரிய இம்மருத்துவமனையின் மொத்தச் செயல்பாடுகளின் பிரதிபலிப்பாகச் சித்தரிப்பது ஆழ்ந்த வருத்தத்தையும் மனச்சோர்வையும் அளிக்கிறது. கழிப்பறை நிலவரம் குறித்தான எனது கருத்தை மீண்டும் வலியுறுத்த விரும்புகிறேன் . தனி நபர் ஒழுக்கம், தனி மனித உரிமை குறித்த சரியான புரிதல், பொது இடங்களில் விதிகளை மீறாத தன்மை போன்ற விழுமியங்களை ஊட்டுவதும் வளப்படுத்துவதும் தான் இதற்கான நிலையான தீர்வு. அந்த இலக்கை அடைய ஒட்டுமொத்த சமுதாயமும் முனைப்புடன் முயல வேண்டும். நன்றி. வணக்கம்.

- இ.தேரணிராஜன், முதன்மையர், ராஜீவ் காந்தி அரசுப் பொது மருத்துவமனை, சென்னை.